ការស្រាវជ្រាវថ្មីមួយបានបង្ហាញថា មនុស្សវ័យចំណាស់ដែលមានកម្រិតវីតាមីន D តិចនៅក្នុងឈាម មានហានិភ័យទ្វេដងក្នុងការវិវត្តទៅជាជំងឺចាស់វង្វេង (Alzheimer)។
ការស្រាវជ្រាវដែលត្រូវបានធ្វើឡើងលើមនុស្សដែលមានអាយុ ៦៥ ឆ្នាំ ជាង ១.៦០០ នាក់ បានរកឃើញថា ហានិភ័យនៃជំងឺចាស់វង្វេង និងទម្រង់ដទៃទៀតនៃជំងឺវង្វេងបានកើនឡើងជាមួយនឹងភាពធ្ងន់ធ្ងរនៃការខ្វះវីតាមីន D។
វេជ្ជបណ្ឌិត ដេវីដ ឡេវែលលីន (David Llewellyn) បាននិយាយថា ប៉ុន្តែ ការស្រាវជ្រាវមិនទាន់មានភស្តតាងគ្រប់គ្រាន់ ដើម្បីណែនាំអោយមនុស្សវ័យចំណាស់ប្រើថ្នាំគ្រាប់វីតាមីន D ដើម្បីការពារការថយចុះស្មារតីនោះទេ។
អ្នកឯកទេសដទៃទៀត លោក កេត ហ្វាហ្គូ (Keith Fargo) ក៏បានយល់ស្របដែរ។ នេះបានបង្ហាញអ្នកថា វាមានការផ្សារភ្ជាប់គ្នារវាងវីតាមីន D និងការវិវត្តទៅជាជំងឺចាស់វង្វេង។
Fargo បាននិយាយថា ការផ្លាស់ប្តូររបបអាហារ និងការត្រូវពន្លឺព្រះអាទិត្យបន្ថែមអាចនឹងជួយបានដោយវិធីណានោះ គេមិនទាន់ដឹងច្បាស់លាស់នៅឡើយ។ គាត់បានបន្ថែមថា យើងមិនដឹងថាតើ ការកើនឡើងកម្រិតវីតាមីន D នឹងបន្ថយហានិភ័យនៃជំងឺចាស់វង្វេង ឬយ៉ាងណានោះទេ។
ការស្រាវជ្រាវ ត្រូវបានចេញផ្សាយនៅក្នុងកាសែត Neurology។
វីតាមីន D សំខាន់សម្រាប់រក្សាសុខភាពឆ្អឹង។ វាក៏អាចជម្រុញអោយមានការលូតលាស់កោសិកា និងជួយរក្សាមុខងារនៃប្រព័ន្ធភាពស៊ាំ និងការរលាក។ វីតាមីន D អាចត្រូវបានទទួលបានតាមរយៈអាហារ និងស្បែកក្រោយត្រូវពន្លឺថ្ងៃ និងទទួលបានពីការប្រើប្រាស់ថ្នាំគ្រាប់។
បញ្ហាវង្វេង មានន័យថាមានការថយចុះនូវការចងចាំ និងការគិតដែលរំខានដល់ជីវិតប្រចាំថ្ងៃ។ ជំងឺចាស់វង្វេង គឺជាទម្រង់នៃជំងឺវង្វេងទូទៅបំផុតចំពោះមនុស្សវ័យចំណាស់ ដែលប៉ះពាល់លើជនជាតិអាមេរិកជាង ៥ លាននាក់។
ចំពោះការស្រាវជ្រាវនេះ អ្នកស្រាវជ្រាវបានមើលលើសុខភាពផ្លូវចិត្តរបស់បុរស និងស្ត្រីដែលមានសុខភាពធម្មតា។ គំរូនៃឈាមត្រូវបានគេយកទៅពិនិត្យនៅពេលចាប់ផ្តើម និងស្ថានភាពស្មារតីរបស់ពួកគេ ក៏ត្រូវបានវាយតម្លៃក្នុងរយៈពេល ៦ ឆ្នាំក្រោយផងដែរ។
អ្នកចូលរួមទទួលបានវីតាមីន D ពីចំណីអាហារ ថ្នាំគ្រាប់ និងការត្រូវពន្លឺថ្ងៃ។ ប្រភពនៃអាហាររួមមាន ខ្លាញ់ត្រី ទឹកដោះគោ និងស៊ុតជាដើម។
អ្នកស្រាវជ្រាវបាននិយាយថា អ្នកឯកទេសមួយចំនួនមិនយល់ស្របអំពីកម្រិតនៃវីតាមីន D នៅក្នុងឈាមល្អបំផុតនោះទេ។ នៅក្នុងការស្រាវជ្រាវ ហានិភ័យនៃជំងឺវង្វេង បានកើនឡើងក្រោម ៣ ដងនៃ ៥០ ណាណូម៉ូលក្នុងមួយលីត្រ។
ភាពពិតប្រាកដថាតើកម្រិតវីតាមីន D ទាបអាចត្រូវបានផ្សារភ្ជាប់ជាមួយនឹងជំងឺវង្វេងនោះ មិនត្រូវបានគេដឹងនោះទេ។ អ្នកឯកទេសនិយាយថា វីតាមីនអាចសម្អាតបន្ទះដែលមាននៅក្នុងខួរក្បាល ដែលត្រូវបានផ្សារភ្ជាប់ជាមួយនឹងជំងឺវង្វេង។
Fargo បាននិយាយថា នេះត្រូវបានបង្ហាញនៅនឹងមន្ទីរពិសោធន៍។ ការថយចុះកម្រិតវីតាមីន D ត្រូវបានផ្សារភ្ជាប់ជាមួយនឹងការស្វិតខួរក្បាលផងដែរ។
រហូតដល់ការស្រាវជ្រាវត្រូវបានបញ្ជាក់ Fargo បានណែនាំថា មនុស្សគ្រប់រូបគួរព្យាយាមញ៉ាំអាហារដែលផ្តល់សុខភាពដល់ខួរក្បាល ដែលដូចគ្នាទៅនឹងអាហារដែលផ្តល់នូវសុខភាពចំពោះបេះដូងផងដែរ។ នេះរួមមានអាហារដែលបន្ថយជាតិខ្លាញ់ និងកូឡេស្តេរ៉ូល។
Fargo បាននិយាយបន្តថា ការធ្វើលំហាត់ប្រាណទៀងទាត់ និងការរក្សាកម្រិតសម្ពាធឈាមអោយនៅថេរ គឺជាមធ្យោបាយល្អ៕
ប្រភព៖http://www.health.com.kh